Su säht mer en Kölle

De Domplomb - Ne imitierte Kölsche - De Domduve - De Besserwesser

Unsere Kölsch-Lektion gibt es jede Woche neu im Express - Die Woche - Und jetzt auch online.

De Domplomb
Et wor för 80 Johre em Kreech, jenau am 3. Nov. 1943, koot noh 7 Uhr. Do schleit en Querbomb en unse Dom un häut en schwer Eck vom Nordtoon eruss. De Nazis hann anderen daachs üvver „die Schändung vum Kölner Dom durch die englischen Terrorbomben“ jedeuvelt. Dat Loch ess dann flöck met Zijjelstein zojemort woode un en janze Häd Kölsche hann die Plomb immer wie e Denk- un Mahnmol aanjesinn. 2004/2005 ess dat Loch dann met dem Obernkirchener Sandstein neu verzeet woode. Wa’mer hück vörm Dom steit un op dä Toon links vum Haupportal lo’t ka’mer en hell Stell sinn.

Ne imitierte Kölsche
„Saach ens Blotwoosch dat ess doch jarnit schwer. Wä nit richtich Blotwoosch sage kann dat ess ne imitierte Kölsche janz jewess…“ Dat ess uss nem Leedche vum Jupp Schlösser un Gerhard Jussenhoven. Dat Wötche Imi kütt us dem Latingsche imitari/nohmaache. Ne Imi ess alsu ne nohjemaate Kölsche. Mer hann en janze Häd Zojereiste alsu Imis he. De mihtste hann sich enjeläv un sin Kölsche jewoode. Wat jo nit schwerfällt en su ner schön Stadt wie Kölle. Mänch einer ess em Fasteleer jecker wie die die en Kölle jeboore sin. Vill besöken och die Kurse vun der Akademie för uns kölsche Sproch, wo se allerhands üvver Kölle un die kölsche Sproch lihre künne.

De Domduve
„…ich drieße op der Dom weil ich en Duv uss Kölle ben…“ su heißt et en nem Bläck Fööss Leed. Dat die immer op der Dom drieße jefällt unsem Dombaumeister Peter Füssenich üvverhaup nit. Un su hät mer sich allerhands Müjjelichkeite ussjedaach, för die Düvjer vum Dom ze verdrieve. Su hatt mer ens e Wanderfalkepäärche met dä schöne Name Agrippina un Arnold op dem Dom aanjesiedelt. Hück hät mer sich die Hanakerei ussjedaach un tuusch die Duveeier jäje Plastikeier. Et jitt vör dem Dom och ne Duvebrunne vum Ewald Mataré. Un die Fastelovendsjesellschaff Colombina Colonia e.V. heiß op Kölsch: Kölsche Düvjer.

De Besserwesser
Schänge kann jeder, ävver et besser maache, dat ess die Kuns!
„Et jitt Lück, die immer alles besser wesse. Mihtens hann die nor schlääch jedresse…“ Oh weih! Dat ess nit fing jesaat! Ävver su heiß et en nem Leed vun de Bläck Fööss un die wesse wat se singe. Ävver met su en Lück muss mer levve odder levve lihre. Dat sin die, die immer noh Fähler söke un sich freue wann se ne Fähler finge. Dobei kummen die sich janz doll vör. Ävver off jeit der Schoss noh hinge loss. Et jitt e Kölsch Wohrwoot: „Besser jeschwijje (geschwiegen), wie de Mul verbrannt.“ Un wie heiß et op Englisch: Nowbody is perfect.