Su säht mer en Kölle

Neujöhrche - Levve jeit wigger - Zom neue Johr -En schwatze Katz vun links

Et Neujöhrche
En Kölle wünsch mer sich: „Ne jode Rötsch en et neue Johr un e jlöcksillich Neujohr.“ Un dann die Antwoot: „Jöv Jott et wöödt wor (gäbe Gott, dass es wahr wird).“ Odder mer wünsch sich: „E jlöcklich Neu Johr, der Kopp voll Hoor, de Mul voll Zäng un ne Brezel en de Häng.“ Un sidder all’ jot erenjerötsch? Mer hann jedenfalls et all jedonn, domet et e jot Johr weed. Mer hann op Neujohr ne Brezel zerresse. Mer hann Jlöcksschweincher met nem Kleeblättche en der Mul verschenk. Et woodt widder wie jeck erömjeböllert, wat de fiese Dämone un Jeister verdrieve soll. No hoffe mer all op e besser Johr wie et 2023 wor.

Et Levve jeit wigger
„Et Levve jeit wigger, ejal wie et jeit. Do ha’mer all kei Breefje vun, dat ess jet wat keiner versteit. Denn met uns hät et nit singe Aanfang jemaat un met uns hö’t et Levve nit op!“ Dat ess uss nem Leedche vum Henner Berzau, wat et Uschi Werner Fluss jesunge hät. Ävver wat wör dat janze Levve wäät, wann sich der Minsch kein Freud dren määt. Un ömesöns ess der Dud un dä koss et Levve. Mer weiß och, dat et Levve schön ess, wa’mer kein Sorje hät. Et jitt ävver och Lück die künne einem et Levver zor Höll maache, nämlich dann wann sei eine drangsaleere (belästigen, peinigen). Un wie säht mer och: Mer muss levve un levve loße.

Zom neue Johr
Besser wie en unsere wunderbare kölsche Leeder ka’mer et allt jar nit sage. För e Beispill en dem herrlije Bläck Fööss Leed „Zom neue Johr“ wo et heiß:
„E bessje mih Hätz un e bessje mih Zick./ E bessje mih Laache un jet winnijer Strick./ E bessje mih Freud un jet winnijer Neid./ E bessje mih Wohrheit/ un jet mih Minschlichkeit…“ Un wie heiß et wigger en dem Leed: „Dat wünsche mer uns all zom Neue Johr./ Loss mer all’ jet draan maache,/ dann weed et och wohr…“ Mer hoffe all op e besser Johr 2024, denn et kann einem angks un bang wäde, wa’mer ovends de Flimmerkess aanmäät un süht wat en der Welt loss ess.

En schwatze Katz vun links
Op der janzen Welt aachten de Minsche op de Vörzeiche. He bei uns deit dat jeder zweite. En Kölle hann se doför „Vörbedügniss“ jesaat. Em Hotel well keiner en nem Zemmer met der Zahl 13 wonne. En de Flochmaschine jitt et kein 13. Reih un och die 17. Reih fählt, weil die Zahl 17 en Italie un Brasilie en Unjlöckszahl ess. Mänch einer hät singe Flochtermin op ne andere Daach verlaat, weil dä op ne Friedaach der 13. fehl. Un aan nem Friedaach dem 13. blieht mer et bess tireck en der Lappekess… Dis Dach ess mer en schwatze Katz üvver de Föss jelaufe. Dobei fohr mer der Schreck durch all ming Jlidder. Alles Käu, domme Verzäll, blos Buheimächerei, odder nit?