Su säht mer en Kölle

Schötzefess - Schötzekünning - Wasser vun Kölle - Kölsch-Orjenal

Unsere Kölsch-Lektion gibt es jede Woche neu im Express - Die Woche - Und jetzt auch online.

Schötzefess
„150 Mann/ un en Fahn vörren draan,/ un de Musick fängk mem Schneewalzer aan…“ dat ess e Leed vun de Bläck Fööss. Jetz laufen widder üvverall de Schötzefeste. Der Name Schötze kütt vun scheeße un beschötze. Met andere Wööt: de Schötze däte scheeße öm för jet zo beschötze. Em Johr 1435 ess de ehschte Schötzebroderschaff en Müllem jejründt woode. Domols weil Kreech wor uss ner Nut eruss. Wie Fridde wor un de Maneere widder besser woodte, hatten de Müllemer suviel Freud am Scheeße kräje, dat se als Broderschaff zesammejeblevve sin. Hück jitt et en Kölle mih wie 40
Schötzebroderschaffte/Schötzevereine,
.
Schötzekünning
„Piff, paff, der Vuggel muss erav…“ heiß et en dem Leed „Schötzfess“ vun de Bläck Fööss. Nit jeder kann Schötzekünning wäde. Dat muss mer sich verdeene, Us Ähnz ess Spass jewoode. Wie mer nit mih scheeße moot, öm för sich zo schötze hann de Schötzebroderschaffte öm de Wett jeschosse. Wä jewenne dät wor Schötzekünning. Jedes Johr weed neu jeschosse. Wä dreimol hingerenander der Vuggel triff darf sich Schötzekaiser nenne. Jede Schötzebroderschaff hät ne Name noh ehrem Patrun. Mihtstens noh St. Sebastianus odder St. Hubertus. En Zollstock es et de Schötzejesellschaff Adler.

Dat Wasser vun Kölle ess jot
Nä, wat hann ming Junge, su nennen ich de Bläck Fööss, för schön Leeder jeschrevve. Et jitt bal kei Thema, wat die nit besunge hann. Su och dat Leed „Dat Wasser vun Kölle ess jot…“ Dat wor ne Werbesproch vun der GEW noch ih dat de Fööss dä för e Leedche jebruch hann. Hoffentlich ess et jot, mer hann he kei ander. En janze Häd domm Spröch jitt et üvver et Wasser: et fällt jet en et Wasser wann ene Termin ussfällt. Em Levve muss mer sich üvver Wasser halde. Wa’mer op jet wadt, kann noch vill Wasser der Rhing erav laufe. Ne besondere Sproch ess: Wasser määt de Auge klor, ävver spetze Fottbacke.

Wat ess e Kölsch-Orjenal?
„Orjenale jitt et en Masse. Dorchmuster ding Famillich bloß. Denn unger dem Herrjott singem Himmel, dat tribbelt, kribbelt, wibbelt wal. Un jederein hät singe Fimmel, un mallich ess e Orjenal…“ Su heiß et en ne Rümche. De mihtste Orjenale, die mer hück noch op Bierdeckele, Bierjläser, Fastelovendsorde odder em Hänneschen fingk, hann em vörije Johrhundert jelääv. Do wor Kölle noch kei Millijonestadt. Hück däten die och nit mih opfalle. Ävver jedes Johr laufen se noch em Fastelovendszoch met: der Möler Bock, et Fleuten Arnöldche, de Böckderöck-Wau-Wau, dä Fressklötsch, der Orjels Palm, Schäbens-Tünn…

Schon gelesen?