Su säht mer en Kölle

Unsere Kölsch-Lektionen für den April

Unsere wöchentliche Kölsch-Lektion gibt es bei uns auch online. Wir wünschen viel Vergnügen beim Lesen.

Aprel, Aprel
Am 2. Poschdaach (Ostertag) hatte mer der 1. Aprel. „Am 1. Aprel scheck mer de Jecke wohin mer well.“ Em Johr 1774 hät et ehschte Mol en Zeidung de Lück för der Jeck jehalde un wiesjemaat, dat mer nit nor Eier bungk aanmole kann, nä och Höhner en alle Färve züchte kann, wa’mer de Wäng vun de Höhnerställ bungk aanstriche dät, die Höhner däten dann die Färv aannemme. Dat hann verhaftich e paar Lück ussprobeet. En minger Puutezick woodten de Pänz en de Apthek jescheck, öm för fünnef Penning „Hau mich blau“ ze kaufe.
Schad ess, dat dä Bruch bal janz ussjestorven ess. Odder sidder noch en der Aprel jescheck woode?

Wieße Sonndaach
Der Sonndaach noh Poschte ess der wieße Sonndaach. Singe Name hät dä. weil en Rom an däm Daach fröher die, die jedäuf wooden sin, en wieße Kleider noh der Kirch jingken. Hück ess et der ehschte Kummeleonsdaach för aach- bes zehnjöhrije Pooschte (Jungen) un Weechter (Mädchen). „Am Wieße Sonndaach jeit mi Püütche met“, säht mer en Kölle. Jeder weiß dann dat et met zor Kummelion jeit. Dann hät mer och e Kummeleonspaar, met däm mer feierlich en de Kirch stolzeet. Dann weed mer och selvs zom Kummeleonspaar. „Dat ess odder wor mi Kummeleonspaar.“ Off bliev mer dann e Levve lang treu zesamme.

Kummeleonsdaach
Dä Daach vun der ehschten hellijen Kummeleon wör der schönste Daach em Levve, ess uns vun der Kirch odder en der Schull wiesjemaat woode. De Verwandtschaff kom un hät schön Jeschenke metjebraat. Do jingk dann su mänchem Kummelekant en der Kirch durch der Kopp: „Vum Ohm Jupp krijjen ich 50,-- Euro, vun der Tant Nett 30.—Euro.“ Off kräät mer dann de ehschte Armbandohr. Hück ess et der ehschte Computer odder et ehschte Händy. Hingerherr weed dann met de Jeschenke erömjestrunz. Dat Drömeröm ess mih wäät wie et Fess selvs. Wä versteit sich allt als Christi Bruck (Braut) odder Engelche?

Aprelwedder
Em Aprel spillt och et Wedder verröck, denn der Aprel määt wat hä well. Do kann et räne wie e Bies, do kann et wärm sin dat de Krole (Krähen) jappe, ävver och esu kalt, dat mer richtich aan et Ziddere kütt. En nem ahle Booresproch heiß et: „Aprelwedder ess wie ne Kinderaasch, eimol drüch un eimol naaß.“ Jäje Rän ka’mer nix sage, do heiß et: „Ne drüjje Aprel ess dem Boor nit ze Well.“ „Ohne Aprelrän keine Maiblomesän.“ Alsu, wann em Aprel et Wedder verröck spillt ess dat normal. Medden em Aprel fängk dann och der Kuckuck widder et Rofe aan: „Kuckuck, Kuckuck“, op ech Kölsch.