Su säht mer en Kölle

Wat dä nit säht - Wieverfastelovend - Äschermeddwoch

"Su säht mer en Kölle", unsere beliebte Kölsch-Lektion, ist nun auch online. 
Wir wünschen viel Spaß beim Lesen.

Wat dä nit säht...?! 
Ne huhe Här us Düsseldorf meinten ens, Düsseldorp wör de Hochburch vum rheinische Fasteleer. Do ka’mer nor sage: „Dä hät en Ääz am wandere.“ Wat op Huhdütsch heiß: „Bei dem wandert eine Erbse!“ Dobei hann de Düsseldorper et all vun uns jeklaut un avjeloht. Un ohne uns kölsche Leeder kummen die och nit us. Die singe för e Beispill: „Do si’mer dabei, dat ess prima. Viva Colonia…“ Och ne schöne kölsche Usdruck ess: „Dä hät et Schoss eruss.“ Wat op Huhdütsch heiß: „Der hat eine Schublade offen!“ Dat muss mer sich jetz ens beldlich vörstelle! Jeck loss Jeck elans un jede Jeck ess anders jeck.

Wieverfastelovend
Dä Name för dä Daach Wieverfastelovend ess ehts Aanfang vum 19. Johrhundert opjetauch. Zeehsch heeß’e „Patronsdaach dä ahl Wiever“. Besonders om Aldermaat leeten de Maatwiever de Sau eruss. Jetz kunnten se ens zeije wä et Rejalt hatt un wat de Botter koss. E Wiev, och „dat Minsch“ jenannt, kann staats, stolz, doll, verröck sin. Ävver och schön. „E schön Wiev hät dä Stiev!“ Wä e kott (böses) Wiev hierodt, hät der Deuvel (Teufel) zom Schwoger (Schwager). Ävver och ne Käl kann e ahl Wäschwiev (Klatschtante) sin, – Jeff speue (Gift spucken) un ander Lück durch der Kakau trecke.

Am Äschermeddwoch ess alles vorbei…
Dä, jetz si’mer em stinknormale Levve aanjekumme! De decke Trumm steit widder en der Eck em Keller. Jetz mösse mer e janz Johr waade, bes dat mer widder jeck sin dörfe. Un üvverhaup wat heiß he jeck? Normalerwies versteit mer unger nem Jeck einer dä et Jäjendeil vun normal ess. En Kölle nit! Mer weiß, dat en Kölle de mihtste Lück jeck sin, un dat ess normal. Wann do för ne Kölsche sähs: „Jeck verzäll?!!“ odder: „Do bes jeck!“, ess dat normal. Mer muss nor oppasse, dat keine Düsseldorper dodrunger ess. Dä künnt dat en der falsche Hals krijje un dann häss de ne Jeck am Hals.